Fylkestinget i Sogn og
Fjordane vedtok 6. juni med 21 mot 18 røyster å løyve 600.000 kroner til
delfinale i Melodi Grand Prix i fylket i 2013 for tredje år på rad.
Venstre røysta mot løyvinga saman med Sp, Krf og SV. Ap, Høgre og Frp utgjorde
fleirtalet, som dermed sørga for at Sogn og Fjordane fylkeskommune samla har gått
inn med 2,25 mill kr til å arranger Grand Prix-delfinalar dei siste tre åra.
Så vidt eg er kjent med, er
Sogn og Fjordane det einaste fylket i landet som har løyvd fylkeskommunale
midlar til Grand Prix-delfinalar.
Her er manus til mitt
innnlegg i debatten (framføringa vart litt kortare pga tidsnød..).
Fylkesordførar,
det er ei god liberal dyd for ein Venstre-mann å
kunne skilje mellom det ein ikkje likar
og det ein vil forby, anten det no er prostitusjon, tigging eller anna.
Men ei like viktig liberal
dyd er å kunne skilje mellom det ein likar
og det ein vil bruke skattebetalarane sine midlar på.
Dette er for meg ei slik
sak.
Eg likar Eurovision Song
Contest, heretter kalla Grand Prix. Eg er “begeistra for denne type
arrangement” for å låne Ap-gruppeleiar Nils Støyva si elegante formulering. Og
eg likar Florø. Florø er kommunen i fylket med størst vekstpotensiale. Florø er
oljebyen, kysthovudstaden, som vi skal og bør satse mykje på i åra som kjem.
Og eg syns i og for seg det
er greit at vi har svidd av ein del pengar på å gjere Florø til Grand Prix-by, ved starthjelp til den første
delfinalen i 2011.
Men no syns eg ærleg talt
det får halde. No er dette eit arrangement som må stå på eigne bein. Om ein
arrangerer MGP to eller tre gonger, det speller inga stor rolle for vidare
merkevarebygging. Vi veit allereie at dette kjem til å gi varige
verknader i Florø, gjennom ein planlagt årleg vinterfestival i slutten av januar
kvart år. Det er kjempebra. All honnør til lokale krefter som tar dette
spranget.
Men så til fylkeskommunen
si rolle. I dag sit vi i Fylkestinget, og har fått høyre av leiaren i Kulturutvalet
vårt at dei ikkje prioriterer dette
innanfor sine rammer – og at beløpet er langt, langt høgare enn noko anna
kulturarrangement i fylket som dei har løyvd pengar til i løpet av 2012.
Og så, kjære Ap, Høgre og
Frp: Viss det er slik som de seier, at ein allereie for to år sidan i praksis forplikta
seg til gi fylkeskommunale midlar til Grand Prix i Florø i tre år – kvifor i all
verda er det då ikkje tatt høgd for ei løyving i fylkeskommunen sitt budsjett
for 2012 allereie? Kvifor står vi her i behandlinga av ein tertialrapport
midtvegs i året og må ta pengar frå fylket sine bufferfond for dei trange
tidene som vi veit står føre oss i åra som kjem?
Og som Krf-representant
Tore Storhaug så glimrande sa det: Vi må ikkje ha så dårleg sjølvtillit i dette
fylket at vi som einaste fylke i landet må betale
for å få lov å arrangere Melodi Grand Prix.
Kva er eigentleg dette? Sogn og Fjordane er ikkje noko
indianerreservat. Vi er - i alle fall bør vere - eit heilt normalt fylke med større vekspotensial enn
dei fleste. Då må vi oppføre oss slik også.
Så i denne saka skal eg
vere kjedeleg, men konsistent. Når ikkje Høgre i denne saka vil stå for ein av
dei fremste borgarlege dydene – ansvarlighet, stram hushaldering med offentlege
midlar og ein medviten grenseoppgang mellom kva som er ei offentleg oppgåve og kva som
ikkje er det – vel, då får Venstre og Krf gjere jobben Høgre ikkje gjer.
Men til slutt: Eg veit sjøvlsagt at det ganske sikkert blir eit knapt fleirtal for ei løyving. Så då vil
eg samtidig nytte høvet til å ønskje arrangørbyen Florø lukke til. Eg er
heilt sikker på at det blir eit glimrande arrangement. Det er ein knallflink
arrangør som står bak.
Nede i Aserbadjan i mai var det
svigersonen til presidenten som blei heist ned på scena i heisekran som
pauseunderhaldning. Kven av Høgre sine
kronprinsar i Florø, Jacob Nødseth og Bjørn Hollevik, som blir heist ned på
scena til Florø for å underhalde det norske folk veit ikkje eg. Men eg gler meg
uansett. Lukke til med arrangementet!
