Påsketreff 2012

Tysdag 3. april vart det for femte år på rad arrangert Påsketreff i Operahuset Nordfjord, i regi av Eid kommune og med Sparebanken Vest som hovudsponsor. I år var arrangementet større enn nokon gong, med 33 bedriftstands frå heile Nordfjord og ca 350 besøkande gjester. Stor stemning - les meir om arrangementet her! Til alt overmål heldt kvelden fram med artistslepp for Malakoff Rockfestival på Eid si nye klubbscene Gymmen rett ved Operahuset.

Her er min apell ved opninga av Påsketreffet:

For tre veker sidan sto 40 ungdommar frå Eid vgs, frå heile Nordfjord, på scena i operasalen rett bak for oss, og framførte ei oppsetning av musicalen Les Miserables – ei 2 ½ times oppsetning på engelsk - som ingen av oss 1200 som såg forestillinga nokon sinne kjem til å gløyme.

Det var eit trøkk, ein nerve, ein kvalitet i det som blei vist på scena som du rett og slett ikkje skulle tru var mulig. Det var ikkje elevar på ein "eliteskule" eller "talentfabrikk", men av og med heilt vanleg ungdom på ein ikkje heilt vanleg stad midt på Vestlandet.

Den type ”ute av kroppen”-opplevelsar har eg hatt mange av etter at eg flytta tilbake til Nordfjord frå Oslo for snart fem år sidan. I næringsliv, i kulturliv, i idrett og friluftsliv og på andre område.

Eid og Nordfjord er rett og slett ein stad der det for tida skjer utruleg mykje spennande, og der du kan utfalde deg og leve ditt gode liv. Og ikkje minst: Gi ungane dine – dei du har eller har tenkt å få – ein stad å vekse opp som trumfar det meste.

Eg har sjølv budd mange år både i Oslo og i Bergen, og veit at det kan vere kjempebra på sin måte. Men på eitt punkt er det ein viktig forskjell: Det å velje å leve og bu i Eid og Nordfjord betyr at du har ein unik mulighet til å utgjere ein skilnad, til å påverke utviklinga. Til å føle at du og din innsats betyr noko, og at det gir deg noko tilbake som du kjenner heilt inn i ryggmargen.

Men det krev at du faktisk engasjerer deg, tenkjer, gjer, vil noko. I Eid og Nordfjord vil det aldri bli nok å lene seg tilbake og vente på at nokon andre skal skape framtida for deg. Men vi kan gjere det litt lettare for deg å finne fram, og la folk, bedrifter og kommunar møtes. Difor har vi gleda av å invitere til Påsketreff i Operahuset for femte år på rad.

På femårsjubileet er det fantastisk kjekt å kunne seie at i år er Påsketreffet større enn nokon gong: Vi har 33 stands, og i løpet av kvelden vil vi ha ca 400 menneske innanfor døra.

Alle dei du møter på alle standsa rundt om i lokalet her i kveld, er folk som vil noko. Dei brenn for nåke, og dei vil ha deg med. No har du sjansen: Anten du er på jakt etter jobb, ein stad å bu, nokon som kan hjelpe deg å løfte draumen om å skape sin eigen arbeidsplass, eller rett og slett berre vil halde deg litt oppdatert på kva som skjer.

Så gå rundt på stands. Følg med på presentasjonane i kinosalen. Snakk med nokon du ikkje har snakka med før. I kveld har du sjansen til å ta Nordfjord på pulsen. Heile Nordfjord – frå ytste Stad til inste Stryn. Eg trur du vil bli overraska, og at du vil ha det kjekt i kveld.

Og når vi er ferdige her, blir det meir moro i Gymmen. Då overtar Malakoff showet, og då veit vi at vi har mykje bra i vente.

Men no er det nok prat: No er resten av kvelden dokka: På vegne av alle oss som er her i kveld gjenstår det berre å seie ein ting: Velkommen til Påsketreff 2012!

Opningstale separatutstilling av Øyvind Botn

Kulturhuset Gamlebanken, Nordfjordeid, søndag 1. april 2012

Det er ei glede – og ære – å få lov å opne ei utstilling i Gamlebanken med ein kunstnar frå vår eigen kommune som har sett så sterke spor etter seg som Øyvind Botn.

Neste år er det 60 - seksti - år sidan Øyvind Botn frå Eid og Stårheim d

ebuterte på Vestlandsutstillinga i Bergen. Der har du etter debuten i 1953 delteke over 20 gonger. Du har opp gjennom di karriere halde ei mengd separtatutstillingar, og vore representert på den tradisjonsrike Statens Høstutstilling og mange andre store kunstutstillingar i inn- og utland.

Kunsten din er kjøpt inn av mellom anna Riksgalleriet, Samtidsmuseet i Oslo, Norsk Kulturråd, Universitet i Oslo. I mange offentlege bygningar i vårt eige fylke heng din kunst på veggane. Du har eit kunstnerisk uttrykk som er særprega, og som eg vil våge å kalle tidlaust. Det vitnar dagens utstilling, med måleri du har laga dei siste 4-5 åra, i høgste grad om.

Noko som imponerer meg spesielt er at du som biletkunstnar er autodidakt, altså sjølvlært. Det er verd å stoppe opp litt ved det at du – ein sjølvlært ung kunstnar frå bygda i Nordfjord - tilbake i 1953 ”slapp til” på den allereie då tradisjonsrike Vestlandsutstillingen i regi av Bergen Kunstforening. Det var i ei tid der respekten for autoritetar og formell utdanning, og skiljet mellom by og land, var langt større enn i dag.

Det at du likevel vart akseptert i ”det gode selskap” fortel sjølvsagt om eit unikt talent. Men det fortel også noko om vilje og ureddhet. Å velje eit liv som kunstnar, det trur eg krev ikkje berre eit spesielt talent, men også ei heilt spesiell vilje til å kaste seg inn i det ukjente. Det krev mot å bryte seg ut dei rammene som vanlegvis er sett for livet ditt frå familie, bygda rundt deg og omgjevnadene elles.

Eg har jobba i fleire år med næringsutvikling og grunderbedrifter. Det slår meg stadig sterkare at bedriftsgrunderen og kunstnaren har veldig mykje felles som typar. Den ekstreme viljen til å gå sine eigne vegar, forfølgje sin ”indre flamme” og til å velje det utrygge framfor det trygge. Å med opne auge velje eit liv der du ikkje kan vite om du har ei trygg inntekt eller eit arbeid å gå til i åra som ligg framfor deg.

Det livsvalet gjorde du tidleg på 1950-talet. For deg var det rett, og har gitt deg eit rikt liv i alle åra som har kome etter, der du har fått utfalda dei evnene du heile tida hadde i deg. Og ikkje minst: Gitt alle oss andre kunstopplevingar som har berika liva våre. Og faktisk ikkje berre med biletkunst: Du er også diktar og novellist, sjølv om det er biletkunsten som er mest kjent og som vi markerer her.

Eid er i dag ei kulturkommune nesten utan sidestykke. Eg synst noko av det mest fantastiske med Eidasamfunnet i dag er å sjå kor mange barn og unge som har den sjølvtilliten som skal til for å tore å gå sine eigne vegar, slik du gjorde for ein mannsalder sidan. Til å stå på ei scene og kaste seg ut i det. Øve og gi av seg sjølv for å få til noko ein ikkje trudde på førehand ein kunne få til, anten det no er idrett, musikk eller kunst.

Akkurat når det gjeld biletkunst skulle eg for øvrig ynskje vi kunne gitt endå fleire born og ungdom eit tilbod, og at vi kunne få fram fleire unge talent som kunne gå i dine fotspor. Det er eit område der kulturkommunen Eid enno har noko å gå på, trur eg. Og har du gode råd om korleis vi kan få det til, tek eg imot det med takk.

Uansett: Eg er svært glad for at vi i Påska 2012 no får høve til å oppleve kunsten til Øyvind Botn her i tradisjonsrike Gamlebanken. Det er eit hus vi er stolte av som ein del av vår felles kulturarv i Eid. Det same vil eg seie om din kunst, Øyvind Botn. Det er ikkje noko slumpetreff at du var den aller første som fekk Eid kommune sin kulturpris.

Takk for at du har gjort denne utstillinga mulig. Og takk til Arve Espe og Gamlebanken for at de har teke på dykk vertskapsrolla.

Med det vil eg erklære separatutstillinga til Øyvind Botn i Gamlebanken 2012 for opna.

Alfred Bjørlo, ordførar i Eid

Flyktningar i Eid: Svar til Dag og Tid

Dag og Tid trykte 23/3 ein artikkel om Eid kommune og mottak av flyktningar, skriven i velkjent elegant polemisk stil av Jon Hustad. I artikkelen framstår Eid som ei kommune der eit fleirtal er negativt innstilt til flyktningar og asylsøkarar, og Ap er dei ”kvite riddarane” som vil noko anna. Nettversjonen av artikkelen blir no blir ivrig spunnen i sosiale media av Ap sitt velsmurte propagandaapparat, i ein dagsaktuell situasjon der Ap har desperat trong for å leie merksemda bort frå eiga regjering sin knallharde asylpolitikk.

Artikkelen skildrar ein røyndom eg ikkje kjenner meg att i. Nylig avgått Ap-ordførar Edvardsen har hatt seks år på å utforme Eid kommune sin flyktningepolitikk. Ho må stå fritt til å meine at den ikkje er god nok så snart ho sjølv har gått av, ved plutseleg å lansere eit ”benkeframlegg” på eit kommunestyremøte ho ikkje har lufta i nokon samanheng tidlegare. Men spesielt konstruktivt er det ikkje, sjølv om eg tek det som eit hyggeleg kompliment at avgåande Ap-ordførar legg lista høgare for ein nyvald Venstre-ordførar enn for seg sjølv i flyktningepolitikken. Det er ei utfordring eg meir enn gjerne tek.

Eid kommune har tatt mot flyktningar sidan 1987. Totalt har Eid kommune med 5.900 innbyggjarar (ca 0,1% av folketalet i Noreg), tatt mot 230 flyktningar. I periodar har Eid også hatt asylmottak. Dei siste åra har Eid kommune – under Ap-ordførar Edvardsen si leiing - hatt ein langsiktig strategi på mottak av ca 10 flyktningar pr år og bygd opp mottaksapparatet ut frå det. Nokon år litt fleire (i 2011 var det 15), nokon år litt færre. Strategien har vore at vi skal ha eit skikkeleg apparat klart for å ta mot alle som kjem til oss.

Pr i dag er det ca 60 busette flyktningar i Eid. Ca halvparten er born. Dei fleste er frå Somalia, Eritrea, Burundi og Afghanistan. I tillegg har Eid vidaregåande skule ei eiga introduksjonsklasse for ungdom med flyktning- og innvandrarbakgrunn for heile regionen rundt oss.

Eid har lagt særleg vekt på å styrke ressursane i grunnskulen til å ta mot born og ungdom med flyktningbakgrunn. Det har alt å døme vore vellukka. Etter ønskje frå IMDI har vi også ”vridd” mottaket i retning fleire einslege mindreårige asylsøkjarar, i praksis 15-17 år gamle gutar. Vi har dei siste tre åra tatt mot ni einslige mindreårige asylsøkjarar. Vi vil i 2012 ta imot ytterlegare tre av dei samla sett 400 einslege mindreårige asylsøkjarane som er venta til Noreg, slik IMDI har bedt oss om.

Einslege mindreårige asylsøkjarar krev særleg tett oppfølgjing. Vi har etablert eit omfattande apparat rundt ungdommane i form av ekstra barnevernsressurar, miljøteraputar med meir. Eg opplever det som om Eid har lukkast med å få ungdomane integrert i lokalsamfunnet. IMDI sitt ønskje om at vi skal ta imot fleire i 2012 er eit prov på det.

For å huse flyktningane driv Eid kommune omfattande leige, kjøp og bygging/ombygging av bustader. I dag har kommunen 28 bustader til bruk for flyktningar,. I 2012 vil vi tilrettelegge fleire. Det vi ikkje gjer, er å drive ”kjøpsspekulasjon” i bustadmarknaden utan å ha nødvendige andre ressursar til å følgje opp dei som kjem, sjølv om dette isolert sett kanskje kunne vore ei inntektskjelde for kommunen med statlege refusjonssystem.

Dag og Tid omtaler Eid som eit ”utstillingsvindu” for Venstre. Det er hyggeleg, men eg vil minne om at det enno er berre nokre månader sidan valet. Sjølv eit liberalt paradis blir ikkje skapt over natta.

Eg ser det som svært truleg at Eid kommune med Venstre-ordførar og eit sterkt Venstre dei komande fire åra kjem til å auke innsatsen for å hjelpe flyktningar, samanlikna med dei seks åra vi har bak oss med Ap-ordførar. Men då skal vi gjere det ut frå ein gjennomarbeidd strategi, og vite at vi har ressursar i alle ledd til å følgje opp dei som kjem. Det er eit prinsipp eg ikkje vil rokke ved, av respekt for dei vi skal ta mot.

Eg kjem aldri til å vere med på at flyktningepolitikken skal utformast gjennom benkeforslag og ”talleik” i eit kommunestyremøte. Vi skal ha ein plan for det vi gjer først. Så skal vi gjere det.

Så eg kan love Jon Hustad og Dag og Tid sine lesarar at vi skal bidra til å syne at Venstre sin flyktningepolitikk på nasjonalt nivå ikkje berre er teori, men også praksis. Eg forstår godt at Ap no må ta grep for å framstå som mindre inhumane i asylpolitikken. Eg vil likevel tilrå at det grepet Ap tek er å endre asylpolitikken, til dømes ved å stoppe utkastinga av uskuldige born som har budd lenge i landet.

I lengda slepp ein ikkje unna berre med å drive symbolpolitikk frå talarstolen på lokalplanet som kan”spinnast” av partiet sitt PR-apparat på Youngstorget. Det blir lite humanitet av slikt, både i teori og praksis.

Alfred Bjørlo (V)

Ordførar i Eid

Vekeplan veke 13-14

Her finn du ei grov oversikt over mine planar for dei to neste vekene (inkludert påskeveka). Du er velkomen til å besøke meg på kontoret, men avtal helst på førehand pr mail eller sms sidan eg er mykje på farten. Kontaktinformasjon finn du her.

Måndag 26. mars

Møte i Nordfjordrådet, Eid. Innkalling og sakliste finn du her

Tysdag 27. mars

Styremøte Nordfjord Vekst, Måløy

Onsdag 29. mars

Møte i Sogn og Fjordane fylkeskommune sitt Hovudutval for opplæring. Sakliste og sakspapir finn du her.

Torsdag 30. mars

NHO Sogn og Fjordane sin årskonferanse - deltaking i panel om samarbeid kommune/næringsliv.

Generalforsamling Nordfjordkryssing AS.

Denne dagen er det også kommunestyremøte i Eid. Møtet vil bli leia av varaordførar Gunvald Ludvigsen. Innkalling og førebels sakliste finn du her.

Fredag 30. mars

På kontoret

Søndag 1. april

Opning av separatutstilling av kunstnaren Øyvind Botn i Gamlebanken, Eid (kl 16).

Måndag 2. april

På kontoret

Tysdag 3. april

Påsketreff i Operahuset Nordfjord. Meld deg på!!

Onsdag 4. april - måndag 9. april

Påskeferie

Vekeplan veke 12

Her finn du ei grov oversikt over mine planar for veka. Du er velkomen til å besøke meg på kontoret, men avtal helst på førehand pr mail eller sms sidan eg er mykje på farten. Kontaktinformasjon finn du her.

Måndag 19. mars

Diverse møte i Oslo om grøn datalagring

Tysdag 20. mars

Presentasjon og befaring på Harpefossen Skisenter

Møte om SLT-samarbeid i Eid (rus- og kriminilaitetsforebygging)

Onsdag 21. mars

Førebuingar til Formannskapsmøte. Orientering om pågåande utviklingsprosjekt knytt til Nordfjord sjukehus.

Torsdag 22. mars

Formannskapsmøte. Startar med bedriftsbesøk på Norgesvinduet Bjørlo kl 11. Felles arbeidsmøte med Driftsutvalet kl 12-14 om nytt omsorgssenter. Ordinært formannskapsmøte kl 14, som blir innleia med orientering frå Statnett om arbeidet med 420 kV-linja gjennom Eid, som snart startar opp.

Fredag 23. mars

Frukostmøte med næringslivet

Helsing til Folkeakademiet sitt årsmøte

Laurdag/søndag 24-25. mars

Samling for Venstre sine folkevalde i Bergen