Kva gjer eigentleg
eit kommunestyre? Ein kan for tida få inntrykk av at lokalpolitikarar knapt
brukar tid på anna enn å diskutere kommunereform. Slik er det ikkje. Det skal eg fortelje litt om her, med kommunen eg er ordførar i, Eid, som døme.
På det siste kommunestyremøtet før sommaren i Eid var det 44 - førtifire - saker på dagsorden. Éi av dei handla om kommunereform. 43 saker handla om heilt andre
ting - store og små saker som handlar om å utvikle lokalsamfunnet Eid med 6.000
innbyggjarar og eit næringsliv i vekst.
Så for å syne kva kommunepolitikk er i praksis, tenkte eg å
dra kort gjennom 16 store og små vedtak i Eid kommunestyre den 22. juni 2016 (i
tilfeldig rekkefølgje og i mi eiga oppsummering). Lista er på ingen måte utfyllande, men gir eit lite innblikk
i kor mangfaldig den kommunale verda er - i Eid og alle andre
kommuner rundt om i landet.
Så her er lista: 16 utvalde vedtak i kommunestyret i Eid 22.
juni 2016:
1. Klima- og
sykkelsatsing i Eid
Miljødirektoratet har lyst ut 100 mill kr til klimatiltak i kommunane
i 2016, for å få fart på overgangen frå fossil- til nullutsleppssamfunnet. Eid
kommune har no bestemt at vi vil søke midlar frå ordninga til to ting:
A) Lage ein kommunal sykkelstrategi for å auke sykkelbruken
og redusere bilbruken i kommunen. Som eit strakstiltak vil Eid melde seg inn i
Statens Vegvesen sitt sykkelbynettverk.
B) Bygge klimavenlege nye omsorgsbustader som kan vere eit
førebilete for korleis omsorgsbystader kan byggast utan klimautslepp.
2. EPC (energisparing
i kommunale bygg)
EPC - energisparekontrakter - er eit verkemiddel for å få
"opp på bordet" og gjennomført flest mulig energispare-tiltak i
kommunale bygg på kortast mulig tid. Røynsler frå andre kommuner har synt at
energibruken kan kuttast med 20-30%, og at investeringane som oftast er tente
inn i løpet av få år.
Kommunestyret har no bestemt at Eid skal gå vidare med EPC
som verkemiddel for energisparing i Eid, og få opp ei sak om oppstart snarast
råd etter sommaren. Det kan bety investeringar på fleire titals millionar kroner
i meir energismarte bygg i Eid.
3. Digitaliseringsstrategi
- lettare tilgang til tenester og informasjon ditgitalt
Nordfjordkommunene har samarbeidd tett om IKT og
digitalisering i 15-20 år. No går samarbeidet vidare med ein ny
digitaliseringsstrategi, for å få fart på utrullinga av løysingar som gjer
tenester og informasjon i kommunane lettare tilgjengeleg digitalt - og legg til
rette for å samordne informasjon frå stat og kommune. Teknisk, men utruleg
viktig for folk i kvardagen i åra framover.
Kommunestyret i Eid vedtok digitaliseringsstrategien - men
han er berre mulig å gjennomføre i samarbeid med andre kommuner (så lenge vi ikkje
har éin Nordfjord-kommune..)
4. Eldre og
nærkontakt
Eid Eldreråd har løfta eit lite omsnakka tema på dagsorden i
Eid: Eldre sin rett til nærleik, intimitet og seksualitet som del av eit godt
liv - også når ein blir bebuar på ein kommunal institusjon.
Kommunestyret har no vedtatt at Eid i eldreomsorga, i og utanfor institusjon, skal
arbeide for å styrke kompetansen til helse- og omsorgspersonell slik at ein på
ein god måte kan legge til rette for at eldre kan oppleve nærleik, intimitet og
seksualitet som helsefremjande delar av livet. Dette skal forankrast i alt
planverk, og i fysisk utforming av institusjonane i kommunen vår. Du kan lese meir om saka på TV2 sine nettsider eller NRK sine nettsider.
5. Val av forliksråd
og meddommarar (jurymedlemmer)
Eit viktig prinsipp i den norske rettsstaten er at du skal
bli "dømt av dine likemenn". Difor er det kommunane si oppgåve å
velje ut personar i kvar kommune til å vere
meddommarar i tingretten og lagmannsretten (jurymedlemmer). I tillegg vel
kommunene eit lokalt forliksråd, som er det lågaste leddet i rettssystemet i sivile saker. Forliksrådet spelar etter mitt syn ei svært viktig rolle i å
løyse konflikter mellom privatpersonar på eit lågast mulig nivå.
Eid kommunestyre har no valt 10 menn og kvinner frå Eid som
meddommarar i Lagmannsretten, 18 kvinner og menn til Tingretten og 6
meddommarar til Jordskifteretten. Kommunestyret valde også eit Forliksråd for
Eid med tre medlemmer, leia av Nils Anders Sørland.
6. Nynorsk i
vaksenopplæringa
Kommunestyret vedtok at nynorsk skal vere opplæringsspråk i
vaksenopplæringa i kommunen. Vi meiner det er viktig for at vaksne innvandrarar
raskt skal lære seg "det lokale språket", og lære norsk på same måte
som borna gjer i grunnskulen.
7. Rusmiddelpolitisk
handlingsplan
Kommunestyret vedtok ein ny ruspolitisk handlingsplan for
Eid. Målet med planen er å ein
størst mogleg reduksjon i sosiale- og helsemessige skader av rusmiddelbruk i
Eid kommune - ut frå forskingsbasert kunnskap om kva tiltak som har effekt og
kva som ikkhe har effekt for å nå dette målet. (Mellom anna eit for mange upopulært faktum som strir mot det
politikarar flest likar å snakke om: Informasjons- og haldningsskapande tiltak
som kampanjar i media og skulebaserte tiltak viser i hovudsak ingen
effekt på alkoholbruk eller relaterte problem. Det er regulering av
tilgang og pris som har reell effekt.).
Administrasjonen,
som sidan sist er styrka på dette fagområdet med tilsetjing av kommunelege,
tilrådde å vidareføre same retningslinene for sal og skjenking av alkohol som i
førre plan. Det vart vedtatt med støtte av 6 av 7 parti i kommunestyret.
.
8. Sals- og skjenkeløyve
Kommunestyret skal tildele sals- og skjenkeløyve for alkohol
i kommunen éin gong kvart fjerde år, samt setje vilkåra for løyva ut frå
vedteken rusmiddelpolitisk handlingsplan (sjå over).
Seks restaurantar og skjenkestader i Eid fekk skjenkeløyve
for alkohol: Bryggen Hotel, Nordfjord Hotell, Sentrum Hotel, China Restaurant
Chen, Opp Trappa og Bankkjellaren Bar&Gjestestove. Skjenketidene for øl og
vin (alkohol gruppe 1 og 2 på fagspråket) er sett til søndag-torsdag til kl 01,
fredag-laurdag til kl 02. For brennevin (alkohol gruppe 3 på fagspråket):
Søndag-torsdag til kl 24, fredag-laurdag til kl 01.
Fire daglegvarebutikkar i Eid fekk salsløyve for øl og anna
alkoholhaldig drikke under 4,7%: Coop Mega, Minibakeriet, Rema 1000 og
Bunnpris. Salstida er sett til kl 08-18 på kvardagar og 08-16 på laurdagar.
Kravet i dagens løyve om at varene skal dekkast til med forheng utanom
salstida, blir fjerna.
9. Krisesenter -
samarbeid med Flora
Krisesenter - ein skjerma stad å vere for personar utsette
for vald i familien - er ei kommunal oppgåve som er uråd å løyse aleine for
kommuner på vår storleik. Eid har i mange år samarbeidd med dei andre kommunene
i Sogn og Fjordane om eit felles krisesenter i Florø.
Det er vi godt nøgde med,
og kommunestyret i Eid vedtok å halde fram ordninga med krisesenter i Florø med
Flora kommune som vertskommune.
10. Nye omsorgsbustader
for unge
Eid og mange andre kommuner vil i åra framover trenge betre bu-tilbod
til unge personar som treng heildøgns omsorg. For Eid ser vi dessutan auka
trong for fleire bustader av denne typen, mellom anna fordi vi er vertskommune
for spesialistinstitusjonar i psykiatri og rus.
Kommunestyret har no vedteke å starte opp eit prosjekt for
bygging av 10 nye omsorgsbustader til unge personar som treng heildøgns omsorg.
Ei slik samla løysing vil både gi betre tenester og meir effektiv bruk av
ressursane, og ei sårt tiltrengt fornying av dagens spreidde bygningsmasse. Vi
vil også planlegge bustadene etter høg miljø- og klimastandard, til dømes
gjennom bruk av massivtre.
11. Bru over
Voldsfjorden
Selskapet Voldsfjordkryssing er oppretta av Volda kommune
for å realisere bru til erstatning for dagens ferje Volda- Folkestad. Bru over
Voldsfjorden vil redusere reisetida mellom Eid og Volda/Ørsta frå omlag 1 time
til under 30 minutt, og radikalt forstørre bu- og arbeidsmarknaden mellom
Ytre/Midtre Nordfjord og Volda/Ørsta.
Eid kommunestyre vedtok å teikne seg for aksjar med 50.000
kroner i bruselskapet.
12. Felles
landbruksteneste Eid/Gloppen
Eid og Gloppen er to sterke landbrukskommunar. Vi går no
saman om å etablere eit felles kommunalt landbrukskontor lokalisert på Sandane.
Det gjev større fagmiljø og meir føreseielege tenester for bøndene.
Eid og Gloppen er også samde om å etablere felles
skatteoppkrevjar-kontor. Det blir lokalisert på Eid Rådhus og kjem som eiga sak
over sommaren.
13. Ventilasjon Eid
Eldretun
Arbeidstilsynet har i lengre tid påpeikt at inneklimaet ved
Eid Eldretun må bli betre. Kommunestyret vedtok no i juni å få på plass
solskjerming på fasaden mot sør som eit strakstiltak, og å kome tilbake til ein
samla plan for framtidig bruk av Eid Eldretun og nødvendig oppgradering av
bygget til hausten.
Det kan her leggast til at solskjerming i skrivande stund er
bestilt og vil bli montert innan 22. juli. Det er i tillegg allereie installert
kjøling på kjøkenet på eldretunet ved hjelp av varmepumpe.
14. Styrking av
heimetenesta
Kommunestyret vedtok å styrke budsjettet til heimetenesta
for 2016 med 800.000 kroner, mellom anna for auka bemanninga på kveldstid. Heimetenesta yter hjelp til innbyggjarar som treng kommunale pleie- og omsorgstenester i eigen heim.
15. Oppstart for Sagastad
Kommunestyret vedtok å gje ei oppstartsløyving på 2,6 mill
kroner til Sagastad-bygget i sjøkanten på Nordfjordeid, innanfor den allereie
vedtekne samla ramma for bygget på 27 mill kr. Sagastad er eit opplevingssenter bygd på den
rike vikinghistoria i Eid og Nordfjord, med ein fullskala kopi av det over 30
meter lange Mylkebustskipet som hovudattraksjon.
Sagastad blir bygd med privat kapital frå lokale investorar,
men Eid kommune står som utbyggarar av sjølve bygget finansiert gjennom ei
leigeavtale med Sagastad-senteret.
16. SeaWalk -
flytande cruisekai
Kommunestyret vedtok å gå inn med 3,2 mill kr i aksjekapital
i det nystarta firmaet SeaWalk Nordfjordeid, som er etablert for å etablere ei
"flytande cruisekai" av typen SeaWalk på Godsterminalen på
Nordfjordeid. Her har Eid kommune avsett område til cruisekai i ein alereie
vedteken reguleringsplan.
Samla kostnad på prosjektet er ca 30 mill NOK, og 90% av
dette vil bli privat finansiert. Cruisekai-kapasiteten i Nordfjord er i dag
sprengt, og etablering av ein SeaWalk på Nordfjordeid vil kunne gje store
ringverknader for reiseliv og handel i både ytre, midtre og indre Nordfjord.
----
Då er vi i mål - i alle fall med 16 av 44 saker på sakskartet..
Eg kan nesten garantere at alle finn noko å vere
usamd i og ikkje skjønar vitsen med på lista over. Men samtidig også mykje som eg trur dei fleste synst er bra.
Og meiner du det ikkje er bra
nok og framleis synst lokalpolitikarane er nokre håplause staurar, slik Facebook ofte blir brukt som kanal for å meine i dei fleste kommuner: Ja, då er
det berre tre år til neste val!
Og då er også du som er konge på Facebook og veit det meste om korleis kommunen burde ha vore styrt, hjarteleg velkomen til å melde deg
inn i eit parti, stille på liste og prøve å gjere det betre.
God sommar!
Ingen kommentarer:
Legg inn en kommentar